الطيبة و الاسلوب الكويس don't mix
غالبا ما بنلاقي الشخص الطيب
او اللي من جواه طيب و مش مؤذي و مش متسلط ... حتى لو كان مش طيب في العموم
ساعات بنلاقي اسلوبه مش كويس
عصبي ، مستمع غير جيد ، اسلوبه فظ ، متسرع في القرارات او الاحكام ، الفاظه بذيئة ، سليط اللسان ، ايده طويلة (عنيف ) ... بس طيب
ده اللي دايما بنسمعه او حتى بنقوله عن اولئك الطيبين
و ساعات كمان بيبقى دفاعنا عن نفسنا
ايه المشكلة اني عصبي ، ما انا قلبي عليك .. و طيب
ايه المشكلة في ان لساني طويل او ايدي طويلة ، ما انا مش بيبقى قصدي و بتطلع مني كده و باجي اقولك معلش ، او حتى مش لازم اقولك ما انت عارف اني ... طيب
ايه المشكلة اني متسرع شوية في قراراتي ، ما ده دليل اني مش لئيم و بتعامل بفطرتي و باللي بحسه على طول و اني .. طيب
طب ليه ما تبقاش زي ما انت ... طيب ، و في نفس الوقت تتعلم ازاي تتعامل مع اللي قدامك باسلوب يرضيه او باسلوب انساني بصفة عامة
ليه لازم ادفع دية طيبتك
ما انا في وقت هاجي و اقولك ملعون ابو طيبتك
انا انسان ، و عايز الاقي معاملة كويسة ، و احس اني مرتاح في العلاقة
بنرجع ساعات و نفتكر الناس اللي بتحب تتعامل مع الحيوانات (الاليفة )
و نشبه الطيبين بيهم ، نستحمل خربشتهم بس اصلهم طيبيين
و نقول عنهم ، او عن نفسنا لو احنا من النوع ده ، ان التعامل مع الحيوان احسن من التعامل مع الانسان
اصل الحيوان طيب ، فممكن حتى لو اظهر عنف او اسلوب قاسي
لو عضك او خربشك او اذاك ، هو ما يقصدش ... ده طيب ، بس غريزته بتحكم
لعلمك المقارنة مش منصفة
لان الحيوان وقتها مش بيحلل عنفه لانه طيب
ده بيتعامل بغريزته و بعنف جسمه العادي
يعني القطة هتخربشك يا اما عشان انت اذيتها او خافت منك ، او عشان اظافرها طويلة فغصب عنها بتخربشك و هي بتلعب معاك
القطة هنا مش حاطاك في اختيار
يا تقبلني عشان انا بتعامل بالفطرة و من غير لف و لا دوران و تستحمل خربشتي يا اما بلاش
اصل هي اصلا ما تعرفش تبقى حاجة تانية
مش هتبقى بوشين و لا هتخدعك
عكسنا احنا
احنا بنحلل تصرفاتنا الغير مقبولة ، و ظاهرنا الغير مناسب .. بباطننا الطيب
ما هو ده يا اما عشان احنا مستكترين ندي للي قدامنا غير طيبتنا و باطننا الطيب ده او شايفين ان اللي بنديه ده كتير اوي و كافي جدا للي قدامنا و ما يستاهلش اكتر من كده " مش كفاية اني طيب " ،
او احنا فعلا مش بنعرف نتعامل بشكل انساني كويس و بنبرر لنفسنا و السلام عشان ما نبقاش مرفوضين من الناس او من نفسنا ، فبنفكر نفسنا دايما وبنفكر اللي قدامنا بباطننا الكويس
كفاية عنف
الصوت العالي عنف
النظرة الجامدة عنف
حدة الكلام عنف
الضرب عنف
ده حتى عدم الاهتمام عنف
جسمي وجعني من العنف
لعلمك يا طيب انت ... اللي بتقدمه لي من طيبة ده مش هبة من عندك ، لانك مش هتعرف تعمل غير كده
اللي مش بيقدر ياذي مش هيعرف ياذي
و لو اذى حد فعلا فهو هيتاذي من جواه و يتلخبط و تتكسر حاجة جواه اكتر بكتير من اذاه ليك
هو مش متعرف في السيستم عنده انه ياذي
عشان كده حتى ساعات بنتريق و نقول ده ما بيعرفش حتى ياذي فرخة
اه صحيح ، هو مبدا الاذية مش عنده اصلا
فلا فرخة و لا ثور
ده في ناس حتى لو الحيوانات اذتهم مش هيعرفوا ياذوهم او يتعاملوا معاهم بعنف
البرنامج اللي في السيستم عنده مش متعرف عليه انه ياذي
فكونك بقى يا طيب مش بتاذيني انت كده مش بتتفضل عليا او بتعمل فيا جميلة
ده الطبيعي بتاعك
زي الشخص الاصلع مثلا ، هو اصلع .. مش تفضل منه و لا عيب فيه
هو كده
بس ممكن لو اتاذى جامد من شكله ده يلبس باروكة ، و ممكن كمان لو الاذية لخبطته خالص يزرع شعر ، بس هو في الاصل ايه ؟؟؟ اصلع
هو اه ممكن يتغير ، بس من الاذية و الوجع
بس الاساسي بتاعه .. مش تفضل منه ، دي طبيعة
اه طبعا لازم نحترمها و نقدرها ، و ما نستقلش بيها ، و ما نقولش اهي طبيعته كده فهيفضل كده و مهما اتعمل فيه مش هيتغير فيشرب بقى ، انا اتصرف براحتي ما هو مش هيزعل و لو زعل يعني اخره ايه ؟ و لا حاجة ما هو طيب
لان زي ما اتفقنا ، ممكن ما يتعاملش بطيبة بعد كده لو حس انها جايبة له الوجع و انه مش متقدر ، و يقدر يبين عدم طيبة ، و ممكن كمان ما يبقاش طيب
مش قلنا الاصلع ممكن يزرع شعر !!
بس زي ما انت طيب و ده شئ حلو و جميل و فطرة ناس كتير بتحسدك عليها و تتمنى النعمة دي
بس برضو لازم تبذل مجهود تقدمه انت بقى حاجة للاخر اللي معاك
اللي بنقدمه للناس و بيفرق معاهم مش اللي موجود في طبيعتنا لاصلية
لا .. اللي بنشتغل على نفسنا فيه بنعمله احنا بنفسنا عشان يبسطهم
تخيل انك رجل عندك مزرعة كبيرة وارثها من عيلتك
و اتجوزت واحدة
هي هتبقى طبعا مبسوطة من الجو و المنظر اللي دايما عينيها هتكون شايفاه
بس دورك بقى انك تبني لها بيت تستمتع فيه و تبقى انت اللي عامله لها ، و يكون جذاب و جميل يبسطها
كده هي هتتبسط اكتر ، لانك انت عملت ده
هي بقى مراتك ، هي عيلتك ، هي شوية ضيوف عندك ، هي أي حد
هم أي جماعة بتتعامل معاهم
لكن لو فضلت تقول انا عندي مزرعة كبيرة و شكلها حلو و رميتها تعد في كوخ من قش و لا بيت من بيوت الحيوانات و تقول مش مهم اصل انا عندي مزرعة هييجي اليوم و تقول ملعون ابو مزرعتك ... و تقلب الترابيزة عليك
انا اروح لحد معيشني في بيت حلو حتى لو ببص على صحرا
بس البيت اساسه حلو
صاحبه هدفه انه يبسطني ، مش بيديني اللي متبقي منه
عارف بقى ليه ممكن الست تخون او حتى تسيب جوزها " الطيب " بس اللي مش بيقولها كلمة حلوة بالعكس ممكن يكون كمان بيشتمها و بيضربها ؟
و عارف ليه البنت ممكن ترتبط بحد كلامه حلو حتى لو هي عارفة انه كداب و بيشتغلها
و بتقول انا عارفة انه بيستعبط ، و مش بعيد تكون هي اصل مش بحبه و لا عايزة ترتبط بيه ؟؟
بس هي عايزة حاجة تانية غير الطيبة
هي عايزة تعامل انساني كويس
مش بس البنات
نفس الحكاية مع الرجالة
زي اللي بيسيب مراته الطيبة الكويسة بس شعنونة و بتصرخ فيه هو العيال ليل و نهار
الامثلة كتير
الانسان بيبقى مستعد يسيب اساسيات في حياته لانه بيبقى اتوجع من الاسلوب
و لانه محتاج تعامل انساني
و في المقابل اللي بيحط لك السم في العسل
اللي يتعامل بمنتهى الانسانية و الحنية و التعامل الرقيق
بس من جوة حد بيلف و يدور
نظام كده ياخدك على حجره عشان يسمع منك و يروح ياذيك
سوا كان مديرك او زميلك او ي حاجة من الكلام ده
اصل البني ادم ده بيستغل حاجة مهمة جدا
التعامل الانساني
ده اهم من اي حاجة
زي الدعاية كده ، اساس شغلتنا نبيع الاسلوب و الفكرة و التعامل
حتى لو هتدفعه فلوس كتير
حتى لو مش مقتنع اخر حاجة
الاسلوب الكويس يخليك توافق حتى ان اللي قدامك يستغلك
و تحكي و تفضفض حتى لو اللي قدامك هياذيك من اللي هتحكيه له
مستعد ترمي نفسك في حضنه مهما كان فيه وجع ، بس اصلك محتاج الحضن ده
محتاج التعامل الكويس و التفاهم
محتاج نبرة الصوت الحنينة الهادية
الاسلوب اللي رايح جاي
مش خناقة و مصارعة
مش مين يغلب مين و مين يركب على مين
مش عايز حد يشوفك حيوان يركبك
و مش عايز حد انت تغلبه و تسيطر
انت عايز حد يعاملك كانسان
يشوفك خايف يطمنك ما يستغلش خوفك عشان يسيطر
يشوفك متضايق يراضيك من جوه مش مراضية عشان المركب تمشي و تعدي
يشوفك مش عارف تتصرف يساعدك و ينصحك و يطلع الحلو اللي فيك ، مش يسيبك تخبط دماغك في الحيط عشان خايف لتكون بتستعبط و بتستسهل ، و لا يساعدك و يفضل ماسكها عليك
حضنه ناشف و قاسي ... حضنه حجر
و في حضن تاني بيبقى طري و مريح ... رغم انك لو ريحت اوي بتبقى عارف انك هتلاقي شوك يطلع يبلعك
بس بتبقى محتاج تترمي في لحضن ده
الوحش و اللي بيلف و يدور و مش دغري مش هنقدر نقوله ما يبقش كده
اصله غالبا بني ادم تعبان ، و من جواه في طرق كتير هو مش ماشيها ، و وحوش كتير مسيطرة عليه
بس انت يا طيب ، خليك امان حقيقي
ما تبقاش مؤذي في وشي و حنين في ضهري
نفسي اترمي في حضنك انت يا طيب لاني مطمنة لك بجد
و ماسكة نفسي اترمي في حضن المؤذي لاني لسه بعقلي
بس ليه الحرب بين العقل و الانسانية
الحرب بين العقل و لمشاعر ممكن تكون موجودة
بس المفروض ما فيش حرب بين العقل و الانسانية
ليه مش من حقنا نلاقي الاتنين مع بعض
الاصل الطيب و الاسلوب الراقي الانساني
صعب عليا اوي افضل دايما في الاختيار بين الاتنين
نار الطيب و لا سم اللئيم