متبنجة  

Posted

عارف حالة البنج دي!!
لما تبقى حاسس و مش حاسس في نفس الوقت!
لا لا ، مش قصدي ساعة ما تتبنج
قصدي بعدها بشوية.
لما تبقى حاسس بجسمك او المكان اللي متبنج بس برضو مش حاسس طبيعي .
عارف !!
لما تحط ايدك و حاسس بيها بس كانك مش قادر تتعرف عليها او تديها التعريف اللي متعود عليه منها!
لما تعض خدك مثلا و هو متبنج ، حاسس باسنانك بس مش حاسس بوجعها!

انا بقيت كده
حاسة بالوجع بس مش متعرف
انا اصلا بطلت اتوجع
بطلت احس
بطلت اسرح
بطلت حتى احلم
كل حاجة بقت في النص
لا حاسة و لا مش حاسة
و الاحساس بقى مرتبط بوجود الشئ
لكن انعدامه و لو للحظة ينفيه
بس حتى و هو موجود مش ببقى حاساه اوي
انا حاسة انه مش مش موجود
بس مش قادرة احس انه موجود

يعني مثلا الاكل
انا بقيت باكل كتير
مش عشان انا ببقى جعانة في كل مرة باكل فيها
لا
لما باكل مش ببقى جعانة ... ببقى مش شبعانة
و الاكل بيوصلني مش للشبع لكن لعدم جوع
بس بمجرد ما امضغ الاكل و ينزل معدتي برجع تاني مش شبعانة
معدتي اتبنجت.

بسمع ان في ناس اللي بتدمن الحشيش او اللي بتشربه بجرعات كبيرة اوووي ممكن تموت بانفجار في معدتها من كتر ما هي بتاكل و مش قادرة تحس بالشبع .
انا مش بشرب حشيش و الحمد لله :)
 
بس انا كده
معدتي متبنجة
و بحس بزهق اللاجوع اللاشبع اللي ممكن تحس بيه و مامتك بتعمل الاكل في المطبخ ، و انت مش جعان بس انت عايز تاكل .. انا بقى كده على طول .

مش بس الاكل ، يمكن ده اوضح حاجة ليا لاني فعلا بحاول افقد وزن ، و لان جسمي قابل لكده فعلا ، و لاني حاولت ابدا دايت و نجحت فيه شوية و بان اثر خفيف عليا.

بس برضو العلاقات
فلان او فلانة قريبين انا مبسوطة
قريبين اقصد بيها جسديا
صاحبتي بتكلمني
صاحبتي حاضناني او حاطة ايدها عليا
انا كده حاسة بامان
تشيل ايدها او تقفل السكة
يرجع تاني الهوا يضرب فيا و ابرد
و احس اني لوحدي 

مع الناس مش بحس اني في جماعة او مع حد ، انا بحس اني مش لوحدي ، و عدم وجودهم بيحسسني اني لوحدي
انا عايشة في حالة من نفي النفي
و عمره ما بيوصل للاثبات
تايهة
مشتتة 

موبايلي ضاع .. مش فارقة
متخانقة مع اهلي .. طيب
لسه بفكر في حد كان اكتر من اخويا ، و كان مجرد اخ مش اكتر
بس لما بييجي على بالي بيتحول لطيف
عشان مش واحشني ؟
بالعكس
ده لما البنج بيروح ، و الغريب انه بيروح معاه هو بس
بترجع روحي عشان بس تبدا تطلع 

و اعرف معنى ان كائن حي بيطلع في الروح
و اعرف اهتزازات الجسد وقتها
و اعرف تمسك الجسد بالروح تارة فتصرخ الروح طالبة الحرية و التبرا من هذا الجسد
و تمسك الروح بالجسد تارة اخرى
فينتفض الجسد و يتمزع من داخله
فلا الروح تخرج
و لا الجسد يعود كما كان
لحظات من خروج الروح و يعود كل شئ الى ما يرام
تعود الروح الى داخلي فخالقها لم يسمح لها بعبور ذلك الممر السري الذي ان اجتازته لن تعود ثانية
فتعود لتجد جسدي متكوما على ذاته لا يستطع احتمال حتى انفاسه .

قد تحدث هذه الحالة و انا في احدى المواصلات العامة
فالصق وجهي بالزجاج طالبة الهواء و اصرخ صراخا لا تسمعه طاقاتنا الموجية 

هو نوع من صراخ الارواح
و اسمع صداه و تبح روحي منه بل و تصدع راسي منه ايضا 


اترك كل ما بيدي ، و استسلم لهذه النوبة

اواجه السماء فانا اعرف ان الارواح بعضها لازال حبيسا هناك و لا زالت تصرخ .

او اثناء سيري
و قد حدث لي هذا بالامس
و اثناء سيري
و في منطقة لا استطع ان اصفها بالخالية من الناس لكنها اقرب الى ذلك
و وجدتني انازع
و لا سبيل لي الا ان اجلس على حجر رصيف
فقدماي لا تستطيعان حملي في مثل هذه الحالة
وسط الشارع ، بنت قعدت على لارصيف
الناس بتبص و تبدا تستنج هي
مومس ؟ ده اول احتمال طبعا
ابنة من ابناء الشوارع ؟
تائهة ؟
مختلة ؟
محدش يعرف
و لا انا اصلا عارفة
انا بس بنفذ  اوامر جسدي اللي لا نقاش فيها .

اه احساس الوحدة ممكن احسه في اللحظات دي
احساس اني متسبة من اقرب الناس ... اهلي و الشخص ده
غضب و حزن و اشتياق و سخط و سب و تهديد و حسرة و مناجاة و ارجعوا بقى
و..... خلاص.

تخرج الروح حتى العلامة المسموح لها بها و تعود الي و ابدا انا اعود الى نفسي
و ارجع تاني مش حاسة 

لا بفرح و لا بزعل
و لا جوع
و لا امان
و لا نوم و لا راحة و لا تعب
اصحابي ساعات بيستغربوا و ساعات كمان بيتريقوا
ان انا عادي
هبة عادي
بس اصل انا مش هنا
انا مش متجمعة
انا يوم بيومه
و وقت بوقته
انا كل ساعة بفكر
اصحى من النوم و في دماغي افكار معينة
بالخبرة مع نفسي مش بستغربني و لا بقرر اعمل حاجة في وقتها الا لو لقيت رسالة روحية من الشخص ده باعتها لي
بس بعد ساعة مثلا من صحياني افكر في اللي كان في دماغي و اقول ايه الغباوة دي ازاي كنت هعمل كده
، و اصبر برضو ما انفيش و لا اؤكد و اكمل ، و اشتغل ، بعد شوية ارهاق ، اقول ايه الغباوة بتاعة الفكرتين دول اصلا انا شايفة ان كده الاصح ، و برضو بفضل بنفس الوجه البارد و القرار الثلجي ، لغاية ما ابدا ارتاح شوية ، الاقيني طالعة بفكرة مالهاش علاقة باللي فاتوا ... و هكذا
يومي كله كده
مافيش حاجة معينة بتتعمل
و مافيش قرار بعينه بيتعمل
غالبا بنفذ المثالي
او ال standards
و غالبا برضو ما بحاول اشرك اصحابي فيه عشان عارفة دماغي مالهاش امان .

انا ضايعة تحت تاثير المخدر .

2 comments
رسائل أحدث رسائل أقدم